កីឡាករ កីឡាការិនី ជាតិនិងអន្តរជាតិ ព្រមទាំងអ្នកឧបត្ថម្ភគាំទ្រជាទីស្រលាញ់រាប់អាន!
ដើម្បីអបអរសាទរសមិទ្ធផល និងជោគជ័យនៃព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម 2023 ដែលត្រូវបានរៀបចំឡើងនៅក្នុងព្រះរាជាណាចក្រកម្ពុជាកន្លងទៅថ្មីៗនេះ គណៈកម្មាធិការជាតិអូឡាំពិកកម្ពុជា បានសហការជាមួយដៃគូ ក្រុមហ៊ុនធានារ៉ាប់រង AIA និងស្ថាប័នពាក់ព័ន្ធដើម្បីរៀបចំព្រឹត្តិការណ៍រត់ប្រណាំង អបអរសាទរសមិទ្ធផល និងជោគជ័យនៃព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម 2023 ព្រមទាំងលើកកម្ពស់ការយកចិត្តទុកដាក់ និងការយល់ដឹងដល់ស្ត្រី ដែលមានជំងឺមហារីកសុដន់(CANCER) ដែលកំពុងរីករាលដាលនៅលើពិភពលោក។
អាស្រ័យហេតុដូចបានជម្រាបជូនខាងលើនេះ គណៈកម្មាធិការរៀបចំម៉ារ៉ាតុង សូមគោរពអញ្ជើញកីឡាករ កីឡាការិនី និងអ្នកឧបត្ថម្ភគាំទ្រទាំងឡាយ សូមមេត្តាចូលរួមព្រឹត្តិការណ៍រត់ប្រណាំងអបអរសាទរ សមិទ្ធផល និងភាពជោគជ័យនៃព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម 2023 ដែលនឹងត្រូវបានរៀបចំឡើង នៅរាជធានីភ្នំពេញ នាថ្ងៃទី 22 ខែតុលា ឆ្នាំ2023 ដែលមានប្រភេទចម្ងាយ 10គីឡូម៉ែត្រ 5គីឡូម៉ែត្រ និង2.5គីឡូម៉ែត្រ (សម្រាប់កុមារនិងលក្ខណៈក្រុមគ្រួសារ)។ កីឡាករកីឡាការិនីដែលបានចូលរួមប្រកួតនៅក្នុងព្រឹត្តិការណ៍កីឡាស៊ីហ្គេម (SEA GAMES)កន្លងទៅ នឹងត្រូវបានអញ្ជើញចូលរួមរត់ដើម្បីអបអរសាទរ និងមិត្តភាព ជាមួយកីឡាករកីឡាការិនីយើង ដែលបានចុះឈ្មោះរត់ផងដែរ។
កីឡាករ កីឡាការិនីទាំងអស់ដែលបានចូលរួម នឹងទទួលបាននូវមេដាយ(Finisher) និងវត្ថុអនុស្សាវរីយ៍ផ្សេងៗទៀត។ សម្រាប់កីឡាករ កីឡាការិនីដែលទទួលបានជ័យលាភី នឹងទទួលបានរង្វាន់លើកទឹកចិត្ត ជាសាច់ប្រាក់ផងដែរ។
