យើងបានចំណាយពេលគេងប្រហែល មួយភាគបីនៃជីវិតរបស់យើង ។ ទន្ទឹមនឹងពេលអ្នកវិទ្យាសាស្រ្តកំពុងព្យាយាមរកមូលហេតុថាតើហេតុអ្វីយើងងងុយគេង ដូចនេះវាគ្មានការមន្ទិលសង្ស័យទេដែលថា ការគេង មានអត្ថប្រយោជន៍ដល់ រាង្គកាយរបស់យើងដូចគ្នាទៅនិង ការញ៉ាំ ផឹកទឹក និង ដកដង្ហើមដែរ ។ ការងងុយគេង ហាក់ដូចជាស្ថានភាពដែលអសកម្មភាពទាំងស្រុង ប៉ុន្តែអ្វីដែលយើងមិនបានដឹងនោះគឺថា ក្នុងអំឡុងពេលយើងគេង តើរាង្គកាយរបស់យើងកំពុងធ្វើការដែរឬយ៉ាងណា។
ការគេងលក់ស្រួលនៅពេលយប់ ធ្វើឲ្យយើងមានអារម្មណ៍ស្រស់ថ្លាជាងមុនច្រើន ។ យើងភ្ញាក់ដឹងខ្លួន = មានអារម្មណ៍ស្រស់ថ្លា ក្លៀវក្លា រហ័សរហួន និង សប្បាយរីករាយជាងមុន ។ ក្រៅពីស្ដារថាមពលឡើងវិញ ខាងក្រោមនេះ ជាអត្ថប្រយោជន៍ជាច្រើននៃការគេង ដែលជួយធ្វើឲ្យរាង្គកាយរបស់យើងមានកម្លាំងឡើងវិញ។
1. ការរីកលូតលាស់ និង ជួសជុលជាលិកាក្នុងខ្លួន
ក្នុងពេលគេង ខួរក្បាលរបស់យើងបញ្ចេញអ័រម៉ូនដែលជំរុញដល់ការលូតលាស់ និង បណ្ដុះជាលិកាថ្មីឡើងវិញដើម្បីជួសជុល សសៃឈាម ។ ជាក់ស្ដែង អ័រម៉ូនបង្កើនការផលិតកោសិកាកាត់តែច្រើនឡើងៗ បង្កើតកោសិកាឈាមសកាន់តែច្រើន ដែលជួយប្រឆាំងមេរោគ និង បាក់តេរី ។ ប្រព័ន្ធការពាររាង្គកាយរបស់យើង ត្រូវការសម្រាក ដើម្បីផ្ដល់ថាមពលឡើងវិញដល់រាង្គកាយ ប្រឆាំងនិងការឆ្លងរោគ ទប់ទល់និងការធ្វើសល្យកម្ម និង ការរងរបួសជាដើម។
2. ការចងចាំ និង ការប្រមូលអារម្មណ៍
ការសិក្សាបង្ហាញថា នៅពេលយើងដេក ការចងចាំ និង ជំនាញដែលយើងបានរៀន កាន់តែត្រូវបានពង្រឹង និង កើនឡើងតាមរយៈការផ្លាស់ប្ដូរផ្នែកនៃខួរក្បាលកាន់តែមានប្រសិទ្ធភាព ដែលនេះជាដំណើរការមួយហៅថា “ភាពរឹងម៉ាំនៃការចងចាំ” ។ ការដេកក៏បានបង្កើនជំនាញដោះស្រាយបញ្ហា ការផ្ដោតការយកចិត្តទុកដាក់ និង ផលិតភាពនៃការងារ។
3. សុខភាពឆ្អឹង
តើអ្នកដឹងថា ការដេកលក់ស្រួលពេញមួយយប់ ធ្វើឲ្យសុខភាពឆ្អឹងរបស់អ្នកមានប្រសិទ្ធភាព ដែរទេ? នៅពេលយើងដេក ឆ្អឹងរបស់យើងកំពុងធ្វើការជួសជុល ជំនួសថ្មីនូវជាលិកាឆ្អឹងចាស់ៗ និង ធ្វើឲ្យមានថាមពលឡើងវិញនូវឆ្អឹងដែលចុះអន់ខ្សោយដោយសារការខូចខាតតិចតួចដែលកើតចេញពីការសឹក និង ដាច់រហែកតាមលក្ខណៈធម្មតា នៃសកម្មភាពប្រចាំថ្ងៃ ។ ការស្រាវជ្រាវរបស់ មហាវិទ្យាល័យវេជ្ជសាស្រ្ត Wisconsin ក៏បានបង្ហាញឲ្យឃើញការជាប់ទាក់ទងរវាងការដេកមិនគ្រប់គ្រាន់រាល់ថ្ងៃ និង ការបំពេញតួនាទីមិនប្រក្រតីនៃការវិវឌ្ឍន៍របស់ឆ្អឹង និង ខួរឆ្អឹង និង ដង់ស៊ីតេឆ្អឹងកម្រិតទាប។
4. បេះដូងមានសុខភាពល្អ
ការដេកលក់ស្រួល កាត់បន្ថយការងាររបស់ បេះដូង ដោយសារតែសម្ពាធឈាម និង អត្រាលោតរបស់បេះដូងធ្លាក់ចុះនៅពេលយប់ ។ ម្យ៉ាងវិញទៀត មនុស្សដែលដេកមិនគ្រប់គ្រាន់ ឬ ដេកលក់ហួសកម្រិត ប្រឈមមុខនិងហានិភ័យនៃការវិវឌ្ឍន៍របស់សារជាតិខ្លាញ់ ឬ ខូលេស្តេរ៉ូលខ្ពស់ ដែលអាចនាំឲ្យកើតជំងឺបេះដូង ឬ ជំងឺដាច់សសៃឈាមក្នុងខួរក្បាល។
5. ទម្ងន់ត្រឹមត្រូវតាមកម្ពស់
ការគេងមិនគ្រប់គ្រាន់អាចប៉ះពាល់ដល់តុល្យភាពនៃអ័រម៉ូនក្នុងរាង្គកាយ - អ័រម៉ូនធ្វើឲ្យឃ្លាន និង អ័រម៉ូនខ្លាញ់ អ័រម៉ូនទាំងពីរនេះជួយភ្ញោច និង បន្ថយការឃ្លានចំណីអាហារ ដែលអាចនាំដល់ការប្រើប្រាស់សារជាតិកាឡូរីបន្ថែម និង ចុងក្រោយធ្វើឲ្យឡើងទម្ងន់ ។ ការសិក្សានៅក្នុង ទស្សនាវត្តីវេជ្ជសាស្រ្តផ្នែកអាហារូបត្ថម្ភរបស់អាមេរិកាំង បានបង្ហាញថា មនុស្សត្រូវបរិភោគអាហារជាមធ្យមប្រហែល ៣០០ កាឡូរីក្នុងមួយថ្ងៃ ទន្ទឹមនឹងពេលដែលពួកគេទទួលទានដំណេកយ៉ាងលក់ស្រួល ។ ដូចនេះ ចាប់ផ្ដើមវាស់ទំហំចង្កេះរបស់អ្នក និង រក្សាឲ្យបានទម្ងន់ត្រឹមត្រូវដោយអនុវត្តតាមកាលវិភាគនៃការដេកឲ្យបានទៀងទាត់។
6. ធ្វើឲ្យអារម្មណ៍ប្រសើរឡើង
ការគេង និង អារម្មណ៍មានទំនាក់ទំនងយ៉ាងជិតស្និទ្ធិនិងគ្នា ការគេងមិនគ្រប់គ្រាន់ ឬ ការគេងមិនលក់ អាចបណ្ដាលឲ្យឆាប់ខឹង និង តានតឹងផ្លូវចិត្ត ហេតុដូចនេះការរក្សាទម្លាប់នៃការគេងដើម្បីរក្សាសុខភាព អាចជួយលើកម្ពស់សុខមាលភាពផ្លូវចិត្តផងដែរ ។ ជំងឺគេងមិនលក់រ៉ាំរ៉ៃ អាចបង្កើនហានិភ័យនៃការវិវឌ្ឍន៍ភាពមិនប្រក្រតីខាងផ្លូវចិត្ត ដូចជាការខឹងសម្បា ឬ ការធ្លាក់ទឹកចិត្ត ។ ដូចនេះ សូមដេក និង សូមទទួលបានភាពរីករាយ!
តើមានអ្វីកើតឡើង ប្រសិនបើអ្នកគេងមិនគ្រប់គ្រាន់?
ការគេងមិនលក់ ឬ គេងមិនគ្រាប់គ្រាន់រ៉ាំរ៉ៃ អាចផ្ដល់ផលប៉ះពាល់ភ្លាមៗ ឬ អាចបង្កើនហានិភ័យនៃការវិវឌ្ឍន៍បញ្ហាសុខភាពរយៈពេលវែង:
- អស់កម្លាំង និង ល្ហិតល្ហៃខ្លាំង
- ឈឺក្បាលពេលព្រឹក
- ការចងចាំចុះខ្សោយ និង ពិបាកក្នុងការផ្ដោតអារម្មណ៍
- ឆាប់ខឹង និង ធ្លាក់ទឹកចិត្ត
- បញ្ហាសុខភាពរ៉ាំរ៉ៃ ដូចជាធាត់លើសទម្ងន់ ទឹកនោមផ្អែម និង ជំងឺបេះដូងនិងសសៃឈាម
- បង្កើនហានិភ័យនៃការញៀនថ្នាំ និង គ្រឿងស្រវឹង
- ឆាប់រងគ្រោះថ្នាក់រថយន្ត
- បង្កើតកំហុសនៅកន្លែងការងារ រួមទាំងឧប្បត្តិហេតុ នៅកន្លែងការងារ
- បញ្ហាក្នុងការទំនាក់ទំនង
- កង្វះចំណង់ផ្លូវភេទ
ដំបូន្មានសម្រាប់ការគេងឲ្យបានកាន់តែប្រសើរ
ទោះជាបញ្ហាអ្វីក៏ដោយ មិនត្រឹមតែសំដៅទៅលើការគេងឲ្យបានគ្រប់គ្រាន់ប៉ុណ្ណោះទេ វាថែមទាំងសំដៅទៅលើការទទួលបានគុណភាពនៃការគេងផងដែរ ។ អនុវត្តវិធីសាស្រ្តទាំងនេះ ធានាថា រាង្គកាយរបស់អ្នកនឹងទទួលបានការគេងលក់ស្រួលពេញមួយយប់:
- អនុវត្តតាមកាលវិភាគនៃការគេងឲ្យបានទៀងទាត់
- ជៀសវាងទទួលទានសារជាតិកាហ្វេអ៊ីន ៤ ទៅ ៦ ម៉ោងមុនពេលគេង និង ព្យាយាមកាត់បន្ថយការញ៉ាំកាហ្វេនៅពេលថ្ងៃ
- បង្កើតទម្លាប់គេងដែលមានភាពស្ងប់ស្ងាត់ ដូចជាការតាំងសមាធិ ការអានសៀវភៅ ស្ដាប់ចម្រៀងបណ្ដែតអារម្មណ៍ អុជទៀនដែលមានក្លិនក្រអូប ។ល។
- ជៀសវាងញាំគ្រឿងស្រវឹង និង អាហារដែលមានរសជាតិធ្ងន់មុនពេលចូលគេង
- ចៀសវាងជក់បារី ជាពិសេសពេលជិតចូលគេង
- កាត់បន្ថយសំឡេងរំខាន ពន្លឺ ក្ដៅ ឬ ត្រជាក់ខ្លាំង នៅក្នុងបន្ទប់
- ដាក់ឧបករណ៍អេឡិចត្រនិកឲ្យឆ្ងាយ ពេលគេង
សសរទ្រូងនៃសុខភាព
រយៈពេលនៃការគេងដែលមនុស្សទូទៅត្រូវការ តែងខុសគ្នាទៅតាមមនុស្សម្នាក់ៗ ហើយ រងផលប៉ះពាល់ដោយកត្តាជាច្រើន ។ ទោះជាយ៉ាងនេះក្ដី ចំពោះមនុស្សពេញវ័យ ការគេងនៅពេលយប់មានក្នុងរង្វង់ពី ៧ ទៅ ៩ ម៉ោង ជារយៈពេលដ៏ត្រឹមត្រូវបំផុត ។ ជាអកុសល បើពិនិត្យមើលពេលវេលាដ៏មមាញឹករបស់យើង យើងមិនដែលយកចិត្តទុកដាក់ចំពោះការគេងនោះទេ និង គិតថាវាជាការខ្ជៈខ្ជាយពេលវេលា ។ យើងត្រូវដឹងថា រួមជាមួយអាហារូបត្ថម្ភ និង ការហាត់ប្រាណ ការគេងលក់ស្រួល ក៏មានសារៈសំខាន់ដូចគ្នាផងដែរ និង ត្រូវដឹងថា វាជាសសរទ្រូងដ៏សំខាន់មួយសម្រាប់សុខភាពរបស់យើង។
អត្ថបទខាងលើគឺមានបំណងផ្តល់ជាព័ត៌មានតែប៉ុណ្ណោះ។ AIA មិនទទួលខុសត្រូវលើការខាតបង់ទាំងឡាយណាដែលអាចកើតមានឡើងដែលទាក់ទងព័ត៌មានដែលមាននៅក្នុងអត្ថបទនេះ។
https://www.ncbi.nlm.nih.gov/pubmed/21056174
http://healthysleep.med.harvard.edu/healthy/matters/benefits-of-sleep/why-do-we-sleep
http://sleepedia.in/about-blog-33
https://www.bbc.com/news/science-environment-32606341
https://www.sciencedaily.com/releases/2005/06/050629070337.htm
https://www.summitortho.com/2015/03/06/sleep-habits-bone-health/
https://www.webmd.com/sleep-disorders/features/how-sleep-affects-your-heart#1
https://www.healthline.com/nutrition/sleep-and-weight-loss#section5
http://healthysleep.med.harvard.edu/need-sleep/whats-in-it-for-you/mood